ក្រោយពីបង្ហាញគម្រោងផលិតមនុស្សយន្ដ Tesla កាលពីឆ្នាំ ២០២១ ថ្មីៗនេះ ស្ថាបនិកក្រុមហ៊ុនលោក Elon Musk  បានបង្ហាញវីដេអូខ្លីមួយបង្ហាញពី សមិទ្ធផលគម្រូមនុស្សយន្ដរបស់ខ្លួន Tesla Bot ដែលអាចដំណើរការបានដូចជា ដើរ និងធ្វើចលនាលើកដាក់ និងចាប់ឧបរកណ៍ផ្សេងៗ។ 

តាមការចុះផ្សាយពី The Verge បានឲ្យដឹងថា Tesla Bot នេះ ត្រូវបានលើក Musk យកមកបង្ហាញក្នុងកម្មវិធី Tesla AI Day កាលពីខែ តុលា ឆ្នាំមុន (២០២២) តែកាលនោះវាមិនទាន់អាចផ្លាស់ទី ឬលើឧបករណ៍ផ្សេងៗបាននៅឡើយទេ បានត្រឹមតែលើដៃបក់ទៅកាន់ទស្សនិកជនជាដើម តែបើមើលទៅតាមវីដេអូ ដែលចេញថ្មីៗនេះ យើងឃើញថា វាត្រូវបានអភិវឌ្ឍច្រើន ដោយវាអាចផ្លាស់ទីបានដោយខ្លួនឯង (ដើរ) ដោយឯករាជ្យដូចមនុស្ស (គ្រាន់តែរៀងយឺតបន្ដិច) នៅជុំវិញសាលរចនារថយន្ដ Tesla Cyber Truck ព្រមទាំងអាចចាប់កាន់ និងលើករបស់ផ្សេងៗបាន ដែលក្នុងនោះវា មានសមត្ថភាពអាចរៀនបានរហ័សលើការធ្វើចលនាផ្សេងៗ តាមការបង្ហាញពីមនុស្ស។ បន្ថែមពីនេះ វាត្រូវបានគេ​ update បន្ថែមទៅលើសមត្ថភាពមួយចំនួនបន្ថែមទៀតដូចជា motor toque control, environmental perception and memorization, AI training using human-tracked movements, និង object manipulation ជាដើម។ 

សម្រាប់ព័ត៌មានលម្អិតបន្ថែមទៀត ទាក់ទងនឹងរយៈពេលនៃការសម្រេចការផលិត និងដាក់ដំណើរការជាផ្លូវការ លោក​ Musk នៅមិនទាន់បានឲ្យដឹងនៅឡើយទេ តែគេសន្និដ្ឋានថា វាអាចនឹងចេញលក់មិនយូរទេ បន្ទាប់ពី Tesla សម្រេចផលិតកម្មរថយន្ដអគ្គិសនី pick up Tesla Cybertruck របស់ខ្លួន នៅចុងឆ្នាំ ២០២៣​ នេះ។ 

ប្រភព៖ Tesla 

អត្ថបទ៖ Andra